銀河Fit爆雙箭頭 炒起卡達真尼斯

猪拉多纳

睇完歐聯唔夠喉？聽朝仲有成堆南球盃同中北美冠軍盃畀你過癮！其中美職勁旅洛杉磯銀河就會喺中北美冠軍盃H組主場迎戰哥斯達黎加球隊卡達真尼斯，主隊雙星當路雲同羅比堅尼近期輪流發威，狀態Fit到震，今鋪唔難大炒對手為出線鋪路，1.85倍「讓主」要捧。

（開賽時間：周三早上10:00）
羅比堅尼 當路雲鬥入波

呢個賽事每組3隊只能出1隊，前個星期分組賽首戰，卡達真尼斯作客以4:2贏咗薩爾瓦多嘅梅塔帕，雖然話打雙循環，但簡單嚟講，卡達真尼斯都會係銀河爭出線嘅主要對手，試問銀河今仗點會唔搏命先？再者，銀河對上一次捧盃已經係2000年嘅事，上季佢哋飲恨4強，家陣恨捧盃恨到發燒，鬥志毋庸置疑。

睇番近績，銀河前日朝以4:2反勝皇家鹽湖城，除咗傷愈復出嘅羅比堅尼大演帽子戲法係功臣外，取代古迪仙尼把關嘅巴拿馬新兵門神賓尼度有水準演出亦係關鍵，預計今仗佢會繼續擔正。

至於前仗作客踢和FC達拉斯都連中三元嘅當路雲，同樣狀態十足，銀河火力絕對超班，要炒起有哥斯達黎加國腳前鋒艾歷克史葛因為冇簽證未能披甲，以及箭頭蘭斯簡奴缺陣嘅卡達真尼斯，真係話咁易啦！
中北美冠軍盃H組