真與假冇所謂

猪拉多纳

　　跑大賽、錦標，馬會場內偶爾設有打氣區，以及號召馬迷打氣，藉此增加氣氛，呢種做法用意係好，人氣夠，一呼百應，可能真係感染其他場內馬迷，更加投入賽事。

　　打氣團七情上面

　　但到底當中有幾多人係正牌打氣團？因為好多個成員，喺鏡頭面前見過一百幾十次，唔排除佢哋次次捧場，如假包換係超級粉絲，不過，有啲太過造作、動作浮誇，鏡頭前後兩個樣，似係演戲多於發自內心，睇到不禁令人聯想到喺度做緊戲。

　　諗深一層，真心假意又冇乜所謂，打氣團都係為造勢，鏡頭前為吸引眼球，「架生」上晒手，又開鞭又舉牌又叫囂，佢哋咁落力，真又好、假又好，咪當係賽事日其中一個環節。