蜜蜂竇喪煲魚生粥

猪拉多纳

多蒙特未夾熟難炒不來梅

德甲今晚獨腳戲有好戲上演，由同樣開咧2戰全勝嘅多蒙特主場迎戰雲達不來梅。雖然話「蜜蜂兵團」自德超盃一直表現勇猛，但連主帥高普都承認班波創造力唔及早幾年，又話新兵融合需時，睇佢哋上場都贏得辛苦，今晚隨時重演多鋪小勝收場，一於博4倍「讓球和」啦！

（有線61及201、廣東體育周六凌晨2:30直播）

多蒙特上月底喺德超盃係威係勢大炒拜仁慕尼黑4:2，之後德國盃同德甲開咧戰都大勝收場，不過到上輪返主場迎戰新升班嘅布倫瑞克，喺對方決心死守下，要到75分鐘先打破僵局，最終亦只係險勝2:1。面對死守要打開缺口，其實好講球隊中前場創造力，多蒙特近年先後放走香川真司同馬里奧葛斯等進攻重心，組織力受影響根本唔出奇。
高普認球隊創造力差

更加大鑊嘅係，諗住可以接班做中場指揮官嘅德國新國腳根度簡近排又因背傷缺陣，由薩克達使咗成2,750萬歐元買入嘅星級中場米希達利恩同「加蓬鄭少偉」奧巴美揚又融合需時，難怪高普都話班波創造力差咗，仲話估計不來梅今晚會抄橋死守，場波唔會易踢咁話。
不來梅兩守將有傷

不來梅上季排14過終點的確令人失望，以為佢哋今季2戰全勝就係重振雄風咩？查實佢哋開咧2連勝嘅對手只係弱旅布倫瑞克同奧格斯堡，今仗仲有兩名防線主力卡迪路拿同富斯都有傷上陣成疑，不過如果佢哋肯決心打死守，又或者趁住主隊正選門將維丹費拿因腸胃病缺陣，由副選門將蘭格歷克頂上可以偷番粒，睇怕多蒙特最終都只能小勝收場。
多蒙特食住不來梅

多蒙特近5次主場均贏不來梅，共入8球失2球。

蜜蜂兵團馬高列奧斯上季兩鬥不來梅均有入波。

近4次對碰不論主客均由多蒙特取勝，共入10球只失1球。
首球捧剋星馬高列奧斯

多蒙特進攻主力馬高列奧斯原來對射破雲達不來梅特別有心得，上季兩循環交手，佢每次都係先拔頭籌。更巴閉係佢前季仲踢緊慕遜加柏嗰陣，首循環就幫球隊大炒不來梅5蛋，當中佢就連中三元，今晚玩「首球」唔揀佢點得？