富咸叻過守財奴

猪拉多纳

精明消費 簽入柏加戴倫賓特

英超周六頭場上演倫敦打吡戰，富咸主場鬥阿仙奴，主隊教頭祖爾今夏做咗精明消費者，用咗唔夠1,000萬鎊執到隊波靚仔晒，兩大新兵柏加及戴倫賓特同屬筍貨，球隊三線全面升呢。阿仙奴今季變咗守財「奴」，主帥雲格繼續做孤寒財主，有7,000萬鎊資金都唔肯買人，大軍季初受傷停問題困擾，仲要啱啱喺歐聯搏完，作客讓波必反，撐「讓球主勝」！

（now 621周六晚7時45分直播）

巴基斯坦裔美籍富商沙希罕今夏買起富咸，祖爾錫住新老細個荷包冇亂使錢，呢個荷蘭籍教頭不嬲都有眼光，04至07年執掌熱刺期間先後購入雙翼加里夫巴利及艾朗連儂，前者今時今日已成英超No.1球星。睇番富咸主要新兵，泰拉拔及戴倫賓特都係射得之人，柏加擅長控制中場節奏，三個熱刺舊將都有分量，至於今場受傷休戰嘅門將史基倫堡及中堅阿武列比達就可改善防守，講咗咁多個球員，加埋都唔使1,000萬鎊，真係抵到爛！
阿仙奴傷疲作客讓波危

阿仙奴開咧戰主場不敵維拉，剛過去周中喺歐聯附加賽大勝土耳其球會費倫巴治反彈，主帥雲格壓力稍減。不過，返到聯賽係另一回事，「兵工廠」中後場傷兵問題嚴重，中場戴亞比、阿歷士張伯倫及阿迪達齊齊休戰，中堅華美倫養傷，佢個拍檔哥斯尼有傷兼停賽，要搵右閘沙格拿移入中路頂檔，沙格拿上場喺哥斯尼傷出後串演中堅唔多穩陣，今場防線確係有隱憂。阿仙奴喺歐聯去完土耳其打硬仗，匆匆返國地莊再戰，點計體力都唔及對手。翻查往績，富咸近五次對阿仙奴一勝三和一負，賽績硬淨，本季大軍戰鬥力進一步提升，今場仲有老細沙希罕入場提升士氣，有力保持不敗！