拜仁群星護主大起紐倫堡

猪拉多纳

德甲拜仁慕尼黑主場對紐倫堡，今場係巴伐利亞洲打吡戰，「三冠王」拜仁被熱捧到甩晒轆，無論主Ｗ同「讓球主勝」都冇肉食，考慮到新帥哥迪奧拿仲未執掂防線，遇上踢法明顯轉守為主攻嘅紐倫堡會係對攻好戲，入球大細中位數調整到3.5球，黑柴照捧1.75倍大盤。

(有線61及201台周六晚9時30分直播)

拜仁今季開咧後聯賽兩連勝，不過贏波未能贏掌聲，前仗對慕遜加柏靠對手連環手球至鎖定勝局，上仗作客法蘭克福仲差啲失分，新帥哥迪奧拿夾硬推倒上季軒歷基斯攞到完美成績嘅「4231」陣式，用本身唔算硬淨嘅舒韋恩史迪加任單防中，防線壓力大增，不過哥帥手上嘅牌實在太好，就算拜仁防守能力差咗，季初未遇強隊前相信唔會太影響成績，班球員為咗維護教練，今仗主場踢打吡戰會盡力爭取入多幾球，以減輕哥帥壓力。
紐倫堡打吡戰唔會縮

紐倫堡過去畀人踢法消極印象，但一切已經隨住前度教練赫基喺去年歇冬期離隊而改變，新帥韋辛加追求激情同進取嘅足球，球隊喺上季最後10場聯賽已經有8場開大，今季情況更明顯，赫基除咗帶走沉悶足球外，亦帶走埋佢哋嘅最佳守將添姆高路斯，令防線進一步削弱，但前線就得到上季為德乙聖保利轟入18球嘅德國U21箭頭丹尼爾真錫克加盟，佢喺頭兩場聯賽都表現出色，開咧後兩仗都激戰成2比2收場，今晚打吡戰作客安聯球場冇壓力下唔會縮，入球又點會少呢？