殘兵搞唔掂富咸

猪拉多纳

傷兵成籮「替工」沙格拿踢中堅

飽受內憂外患困擾嘅阿仙奴，周中歐聯贏波後，今晚英超又要喺倫敦打吡作客富咸，隨時又會再失分。唔係力奇潑佢哋冷水，只係傷兵纍纍嘅兵工廠今場有中堅哥斯尼停賽，要搵右閘沙格拿做替工頂住中間，防線信唔過仲點讓波？捧1.75倍「讓主」！

（now621台、廣東體育周六晚7:45直播）
華美倫打柴 哥斯尼停賽

阿仙奴上周開鑼戰1:3反輸畀阿士東維拉，震動全英超，領隊雲格成為眾矢之的，話佢又一個暑假買人不力，班波完全唔夠料爭標。好衰唔衰，隊波近排仲要黑氣纏身，傷完一個又一個，隊長華美倫、中場戴亞比同阿迪達早喺季前賽已經缺陣，新星阿歷士張伯倫又喺對維拉之戰膝部重創要抖半年。到周中歐聯附加賽對費倫巴治，再有哥斯尼畀對手踢爆頭，雖然事後證實傷勢唔嚴重，可惜呢位法國中堅今晚要坐波監，點都係唔出得。

後防鬧兵荒，華美倫同哥斯尼齊齊休戰，雲格中堅位就剩番個德國長人梅迪薩卡，上仗對費倫巴治中途就搵右閘沙格拿頂上，對住呢支火力平平嘅土耳其球隊當然冇問題，照贏3粒冇失波，不過今晚對富咸仲守唔守得住，真係難講。
柏加登場 富咸升呢

主隊富咸喺名帥祖爾領導下，開鑼戰對新特蘭踢出完美穩守突擊戰術，即使全場只得4成控球權，射門次數係5:21之比大落後，只得一次攻門中框就憑卡沙米一箭定江山全取3分。冇錯，富咸今仗有左閘基蘭李察臣同門將史基倫堡因傷要上壁上觀，但中場有新加盟英格蘭國腳柏加首演，呢位前熱刺球星踢慣倫敦打吡肯定唔怕壓力，能攻擅守嘅佢必大大提升隊波嘅攻守能力。

至於前線除咗有「瀟灑哥」貝碧托夫孭飛，後備席仲有由維拉外借嘅戴倫賓特候命，呢位29歲英格蘭邊緣國腳原來係廠仔剋星，近8次對阿仙奴入咗6球之多，考慮埋富咸近5次對住兵工廠只輸過1次，今晚莫講話攞1分，偷雞贏埋都唔出奇呀！
交手往績旺開大

連季前熱身賽，兵工廠連續9場入波。

阿仙奴連續6次對富咸都有波入。

兩軍近6次交手，有4場開入球大。
兩隊夠「火」捧埋入球大

富咸今季借入射手戴倫賓特、中場泰拉拔，配合傳送同射術都咁出色嘅前鋒貝碧托夫，火力提升唔少。對方射手基奧特上場聯賽已經開齋，配合翼鋒禾確特、中場辛迪卡索拉等人，攻擊力有保證。但係佢哋今場後防冇咗哥斯尼同華美倫呢對中堅，隨時由甩漏唔少嘅沙格拿頂上，好難可以保持清白身，1.75倍入球大值得支持。