撐2.22倍半和咪「森多」

猪拉多纳

祖記主將馬治斯奧養傷兼遇剋星

新一季意甲今晚開鑼，其中衞冕嘅祖雲達斯將會出訪上季位列中下游嘅森多利亞。咪以為祖記今夏繼續擴軍就o趙硬森多，查實主隊上季聯賽曾經兩勝祖記，係祖記剋星，加上祖記今仗嘅中前場組合，同上季變動唔少，估計就算今晚贏到波，隨時都要到下半場先搞掂，2.22倍半場和應該有計！

（開賽時間：周日凌晨2:45）

冇錯，祖記係意甲一哥，實力超班，今夏仲為前線引入泰維斯同洛蘭迪兩個世界級前鋒，淨係睇佢哋上星期意大利超級盃大炒拉素4粒就知係猛料。不過，要注意係前線換人多，默契始終要時間培養，最慘係佢哋個進攻發動機馬治斯奧上仗仲被踢傷，右膝韌帶撕裂，至少要抖一個月，就算有法國新星保羅普巴頂替，但係想話半場搞掂對手，你估講咁易咩？
森多上季兩勝「老婦人」

森多呢邊，原來係上季意甲唯一能夠兩個循環都砌低「老婦人」嘅球隊，唔理係符碌定靠真材實料，至少今次碰頭，心理上唔會驚咗對方。再者，森多陣內其實都有唔少好波之人，其中塞爾維亞嘅23歲中場基斯迪錫，盛傳係祖記計劃搵佢接替派路做指揮官嘅目標球員，今鋪交手，佢梗係要踢好波「騷哥利」啦！

仲有一點，祖記原來近6次作客森多，竟然1場都未贏過，只取得4和2負成績，仲要係6場都開半場和，2:2大比數都開過，信數據嘅話，半場和當然要捧場啦！