豪門盲搶人 隨時有反效果

猪拉多纳

上周有兩宗轉會交易備受矚目，就係韋利安轉投車路士及加里夫巴利天價加盟皇馬，雖然仲未落實，但睇嚟車仔同皇馬均志在必得。平心而論，Peter對呢兩宗交易並不睇好。首先，車仔靠班主阿布拉莫域同安治老闆克里莫夫嘅友好關係，攔途截劫已去熱刺體測嘅韋利安，此舉不但犯眾憎，而且睇番車仔陣中已有桑馬達、奧斯卡杜斯山度士、夏薩特等進攻中場，加埋寶刀未未老嘅林柏特，呢個位置根本唔缺人，韋利安上「車」只會令爭位情況更加激烈，隨時適得其反。
天價加盟埋內訌伏筆

至於加里夫巴利轉投皇馬一事搞咗成個暑假，9,900萬歐元轉會費及1,000萬歐元年薪實屬天價，難怪未上艦已惹嚟皇馬眾星眼紅，為內訌埋下伏線。

加里夫巴利以快速及體力化踢法揚名，但畢竟係血肉之軀，佢呢種打法容易受傷。與英超快上快落嘅比賽節奏相比，西班牙足球對技術、整體合作嘅要求更高，熱刺主帥保亞斯係以巴利仔為核心制訂戰術，凸顯其單天保至尊嘅威力，但嚟到擁有C朗、奧斯爾、艾斯高、賓施馬嘅「銀河艦隊」，巴利仔只係其中一粒星，好難再享有喺熱刺嘅進攻自由度，能否適應令人懷疑，因此Peter認為呢宗交易只有一位贏家──熱刺。