美斯養傷尼馬孭飛一樣掂

猪拉多纳

巴塞「-2」照開W

今晚西甲會上演馬拉加主場迎戰巴塞隆拿嘅賽事，客軍雖然有「球王」美斯因傷冇隨軍，但仍有人氣王尼馬擔正孭飛，配合埋要力保正選位置嘅法比加斯，就算作客都有力轟散面目全非嘅馬拉加，讓到2粒照捧2.48倍「讓客」啦！（now632台及廣東體育周一凌晨3:00直播）

西班牙《體育報》話喺上場西超盃受傷嘅美斯尋日都未復操，今場唔踢得，不過球迷唔使擔心嘅，正如主力丹尼爾所講，即使勁到好似法拉利呢啲超級靚車，間唔中都要整吓啦，美斯抖抖「修理」一下好正常。消息指馬天奴將起用法比加斯「扮假９」踢箭頭，即係話想睇「美斯x尼馬」呢個組合嘅球迷們要等下次。
兩件衞將受傷 馬拉加散晒

不過，小妹並唔擔心「地上最強」嘅火力會受太大影響，首先喺上仗對馬體會射入扳平一球成為「救世主」嘅尼馬，已經同隊友愈夾愈好，至於今夏曾受轉會傳聞困擾嘅法比仔喺開季首兩戰亦都踢得特別有火，似乎係要證明自己有能力喺球隊穩佔正選，相信兩支箭頭都會趁「球王」唔喺度時爭取表現，唔入多幾粒又點得先？

「家道中落」嘅馬拉加上季雖然有好表現，但隨住主力艾斯高離隊、上季喺財困下「化腐朽為神奇」嘅教頭比歷連尼轉投曼城，以及杜拿蘭、祖亞昆、沙維奧拿、迪米捷利斯等走人後，隊波基本上已經散晒，前線得番老將辛達告魯斯擔大旗，中後場亦只得番一班二線兵，今場仲要有法維奧費拉拿、維列頓兩件守得之人倦勤，即使波蘭前鋒巴奴斯基趕及註冊落得場，對住「地上最強」都係輸少當贏啦。