主場交手做慣大騷 波圖5、6粒啱數

猪拉多纳

上季喺葡超戲劇性後上封王嘅波圖，今季開咧戰輕鬆以3:1擊敗塞圖巴爾，佢哋火力強勁，近3仗場場都有3個「士哥」，今晚主場撞正狀態同樣唔曳嘅馬里迪莫，有機會合演一場入球大戰，總入球5、6球分別有7同12倍，對碰出擊機會不俗，回報吸引o架！（開賽時間：周一凌晨2:45）
馬里迪莫鬥攻有心有力

波圖喺暑假先後放走占士洛迪古斯同摩天奴，但好彩仲能夠保住首席射手積臣馬天尼斯。呢位哥倫比亞前鋒上季轟入26球，今季無論喺葡超盃同聯賽開咧戰都有入波，射術唔講得笑，加上新兵祖安昆特路又已經開齋，火力依然有保證。馬里迪莫呢邊，上星期主場迎戰勁旅賓菲加，個個都以為佢哋冇運行，偏偏佢哋就打出爭氣波贏2:1，證明都有一定鋒力。

再睇埋數據，雖則話波圖上季未開過總入球6球，但5球都叫做開過3次，馬里迪莫5同6球則同樣開過3次，絕對唔係死守悶波。不過講到靚績，點都要數波圖近4次主場迎戰馬里迪莫，原來有3次開出總入球5個，只要今晚雙方都生性肯攻，自然多波入啦！