切爾達亂攻益晒貝迪斯

猪拉多纳

今晚西甲尾場，由貝迪斯喺地頭迎戰切爾達。首輪貝迪斯作客皇馬表現並唔失禮，喺領先一球嘅情況下僅以1:2落敗，如果把握力再好番啲，相信最少可以拎走一分。點都好，今晚佢哋回師主場，贏面點都大啲，加上對手只係由季前熱身賽到上周都未贏過波嘅切爾達，貝迪斯好大機會喺球迷面前威番鋪，1.63倍主勝夠晒穩陣，唔好嫌奀呀！（開賽時間：周一清晨5:00）
安歷基風格適應需時

貝迪斯周中喺歐霸盃外圍賽報捷，士氣正盛，雖然上季中場核心班納特離咗隊，不過取而代之有愛斯賓奴來投嘅好波之人祖安華度，相信問題已經解決。值得留意嘅係中場黑人球員施迪克，上仗佢對皇馬頻頻利用高速產生唔少威脅，更助攻畀前線嘅佐治摩連拿開齋，今晚只要佢同祖安華度及魯賓卡斯度發揮正常水準，要入一、兩粒根本冇難度。

對家切爾達今季由名將安歷基接手後，成隊波一改以往保守作風玩主攻，踢進攻足球唔係唔好，只係適應需時啫，所以咪搞到一直都贏唔到波囉，上周喺主場一度領先兩球係威係勢，可惜就係太過進取，最終慘被愛斯賓奴逼和2:2，對士氣肯定構成一定影響，今場作客具備一定實力嘅貝迪斯，情況好唔樂觀囉。