PSG無態有質「細」取南特

猪拉多纳

巴黎聖日耳門（PSG）今夏好高調咁搶走烏拉圭中鋒卡雲尼，令球迷都期待呢位射手同瑞典前鋒伊巴謙莫域組成嘅恐怖鋒線。點知PSG雷聲大、雨點小，連續2場聯賽只係入得1球，至今仲未打開勝利之門。佢哋今仗作客南特想3分落袋問題唔大，但就難言狂數對手，1.75倍「入球細」諗得過！（開賽時間︰周一凌晨3:00）
南特防中維列度復出

雖然PSG今季有卡雲尼過檔，又有法國主帥白蘭斯執掌教鞭，不過將帥之間點都需要一段時間磨合。佢哋連續兩場比賽喺先失波嘅情況下逼和對手，就知呢班波仍處於適應期，冇咩大勝本錢。

由於中場馬度迪傷愈有望復出，而且又有簽咗新約嘅隊長堤亞高施華坐鎮後防，呢支班霸足以應付南特火力。講實力PSG明顯高過對手，但要留意佢哋依家只係想贏波攞足3分，冇需要大炒一場，隨時入咗波之後為保勝局就變得不思進取。

南特自知牌面較差，就算今晚喺主場出擊都肯定唔會鬥攻，相信都係疊埋心水擺個「鐵桶陣」出嚟死守，輸少當贏。況且佢哋今場有法國U20世青盃冠軍成員防守中場維列度刑滿復出，進一步提升掃蕩能力，PSG唔似咁易炒得起南特囉。