紅魔雙箭 射瓜藍戰士

猪拉多纳

朗尼擔正 爭氣氹隊友

「魔童」回歸撼車仔！今晚英超將會上演超重量級大戰，由莫耶斯領軍嘅紅魔，喺主場迎戰有「寸王」揸旗嘅車路士，肯定好睇過戲！今場波嘅焦點，除咗「雙莫對決」，當然仲有「寸王」力斟嘅朗尼擔正「鍊車」啦！家陣出走不成嘅「魔童」為咗爭取上陣機會，今晚肯定會搏命同拍檔尹佩斯做番場「拆車騷」，曼聯小讓平半，2.04倍上盤抵玩！（now621台及廣東體育周二凌晨3:00直播）

朗尼為咗「上車」，扭計扭足成個暑假，搞到神憎鬼厭，班隊友同球迷一早就睇佢唔順眼，正當「魔童」以為奸計得逞嗰陣，車路士突然玩嘢愛理不理咁，家陣仲轉軚話會買伊度奧，跣到「魔童」攤攤腰，亦即係話，呢位英格蘭射手好大機會要留多一季先走人，唔想今年過得辛苦，兼且向玩嘢嘅車仔報復，呢場波當然要做番啲嘢啦！紅魔阿頭莫耶斯都相當識做，喺賽前記招事先張揚會派朗尼踢正選，仲話佢應承球迷會做足100分，擺明係要佢用場上表現證明自己啫！
尹佩斯開季2戰入4粒

咁講真，論星味，小妹覺得紅魔肯定及唔上車路士，但紅魔除咗有鬥心超勁嘅朗尼孭飛，仲有至叻「單天保至尊」嘅尹佩斯擔大旗！呢位荷蘭神箭2場波已經入咗4粒，狀態比上季仲要弗，配合今季升呢唔再做廢柴嘅韋碧克，上仗都有2球進帳，呢個進攻組合絕對稱得上係無堅不摧，今晚回師喺上季英超贏足16場嘅奧脫福出戰，想射爆有大衞雷斯缺陣嘅「藍戰士」，絕對唔難囉！
馬達冇態 車仔鋒力跌Watt

當然，小妹唔係懷疑莫連奴嘅功力，但車仔喺佢帶領下嘅首兩場英超，表現唔算出色，特別係鋒線嘅把握力明顯不及上季，除咗啱啱傷愈嘅桑馬達被傳走人，搞到狀態低沉之外，費托亦表現唔到「劊子手」本色，新星盧卡古又未算十分搶鏡，所以「藍戰士」上仗對維拉，咪又係要靠後衞伊雲洛域入波先贏到囉！今晚造訪奧脫福，想唔輸都難啦！
Data King

尹佩斯入波現役一哥

兩軍近6次喺曼聯主場對賽，有5次開入球大。

尹佩斯開咧兩戰入4球，自2011年1月至今已經喺英超射入76球，數量係聯賽現役第1。