皇馬人心惶惶炒唔起 格蘭納達主場恐博下盤

猪拉多纳

今晚西甲獨腳戲值得大家捱眼瞓捧場，CF格蘭納達喺主場對皇家馬德里，受讓1/1.5球隨時爆得出。隨住加里夫巴利「登艦」在即，現時皇馬可以話人心惶惶，除咗C朗，個個攻擊球員都可能入雪櫃甚至被踢走，加上隊長卡斯拿斯唔滿意做後備，士氣勁曳，冷敲格蘭納達下盤好過！（now632台周二凌晨3:00直播）

到底加里夫巴利係咪可以帶起皇馬，暫時仲未知，不過佢得唔到隊友支持幾乎可以肯定。梗係啦，天文數字轉會費有邊個唔眼紅？而且最近有消息話，奧斯爾、迪馬利亞同卡卡已經成為皇馬清洗目標，突然被球會捨棄同背叛嘅感覺，真係非常惡頂，好難相信皇馬球星可以喺呢一刻專心踢波。
格軍上季曾擊沉「艦隊」

咁當然，皇馬喺新教練安察洛堤嘅帶領下，熱身賽表現唔曳，但咁又點？開咧戰咪又係僅僅贏貝迪斯2:1，要求作風保守嘅意大利教頭領軍連場大勝，似乎唔實際。更何況，據講卡斯拿斯唔滿意坐冷板，以佢喺皇馬更衣室嘅影響力，肯定會影響班隊友對肥安嘅信任，淨係靠C朗搏命，唔似可以輕易炒起對手喎！另一方面，格蘭納達上季喺聯賽排第15位，但咪以為佢哋好蝦，實際上佢哋喺主場相當惡，上季聯賽主場唯一大敗係以1:5不敵貝迪斯，其餘18場未輸多過1球，包括以1:0打沉皇馬、1:2不敵巴塞，受讓1/1.5球的確有條件開下盤。