阿仙奴費巴半場獻細

猪拉多纳

一隊留力打吡 一隊冇心冇力

歐聯附加賽次回合，英超勁旅阿仙奴回師主場迎戰土耳其代表費倫巴治，「兵工廠」首回合淨勝三球，形勢大好，今戰保住勝局即可晉級，必以守行先，唔會同你癲！費倫巴治上次喺自己嘅「地獄主場」出擊冇段好睇，擺明冇計，無力製造奇迹，預期今戰少入波，兩隊齊獻「細」，推介1.59倍半場細！

（有線61及201台周三凌晨2時45分直播）
兵工廠揸住三球唔同你癲

阿仙奴首回合用咗半場時間試探敵軍虛實，Feel到費倫巴治冇料到，換邊後一發力就由基蘭基比斯、艾朗藍斯同基奧特建功大勝3比0，純贏級數，冇得傾！「兵工廠」基本上穩奪分組賽入場券，今場有啲例行公事味道，大軍仍然傷兵滿營，守將華美倫、中場阿歷士張伯倫、阿迪達及戴亞比唔踢得，佢哋嚟緊周日要同死敵熱刺合演「北倫敦打吡大戰」，今戰冇必要去得太盡，就算派班正選上陣，Hea踢機會都好高。
費倫巴治歐賽前途未卜

費倫巴治其實擁有唔少名將，古積特、魯爾梅利斯及安利等曾喺英超戰場留低唔少腳毛，不過，睇番首回合戰況，三位巴打退步甚速，古積特一味死跑爛跑，魯爾梅利斯及安利都變晒隱形人，大軍全場冇乜真正黃金餐士，今次離開主場更難反抗，即使有心收復失地，恐怕亦會枕住捱打。費倫巴治因為打假被禁止參與歐洲賽兩年，依家上訴緊未知結果，情況都唔多樂觀，隊內將士氣氛麻麻，隨時無心戀戰。

兩隊08年曾喺歐聯分組賽碰頭，阿仙奴作客5比2大炒費倫巴治，返到主場同對手互交白卷。睇嚟「兵工廠」今戰將傾力發揮地面組織功夫仔，全場搓搓搓瘋狂揼波鐘，估計士哥唔多，「半場細」博得過。