拜仁三冠舊陣照打堡

猪拉多纳

哥帥契仔缺陣 焉知非福

基於拜仁慕尼黑周六凌晨會喺捷克布拉格出戰車路士爭奪歐洲超級盃，第四輪德甲弗賴堡主場對拜仁會提前於今晚上演。拜仁開季三連勝，但表現未能令球迷滿意，外界對哥迪奧拿仍然充滿質疑，今仗作客對弱旅弗賴堡，必踢爭氣波增強超級盃信心，推介拜仁「讓球客勝」。

（有線61及201台周三凌晨零時30分直播）

拜仁三連勝所贏對手實力有限，但過程絕不輕鬆，哥迪奧拿堅持改革令球員未能適應，佢最大問題係要一支接近完美嘅球隊去遷就佢心目中嘅理想踢法，搞到眾將一味注重控球在腳，堅持地波短傳中路入滲，本身最強嘅邊路優點難以發揮，連遠射都減少咗，球員入到禁區都夾硬要互傳，面對密集防線埋門威脅難免下降，最諷刺係近兩場對法蘭克福同紐倫堡，最終都係要靠底線傳中跟住頭槌頂入打開紀錄。
弗賴堡星散唔夠砌

不過，拜仁球員質素太高，適當時間自發作出微調同妥協，最終都可以憑質取勝。哥帥契仔堤亞高艾簡達拿上仗對紐倫堡受重創要抖七周，今仗被迫用番上季三冠舊陣，對現階段嘅拜仁嚟講係焉知非福。

弗賴堡教頭施特拉希上季當選德甲最佳教練，同拜仁三冠主帥軒歷基斯平分秋色，當然有料，可惜球隊今季星散，上季骨幹麥斯古斯、馬基亞迪、卡利古尼、富隆同真羅辛度相繼他投，搞到巧婦難為無米炊，今季三戰只得一分共失八球，上仗對賀芬咸若非對手中場沙利荷域早段被逐，未必可以攞到今季第一分。

弗賴堡今晚面對拜仁欠固守本錢，呢場波拜仁贏面高，但贏幾多球同幾輕鬆，就要睇哥帥戰術安排，「讓球客勝」係黑柴唯一推介，但只得1.54倍，菠菜價值其實唔高。