紅軍副選「-2」照炒得「諾」

猪拉多纳

英格蘭聯賽盃去到第2圈，大部分英超球隊都已經加入戰團，今晚就有利物浦主場迎戰英甲分子諾士郡！紅軍喺聯賽創下近5季最佳開局，今場就算出副選，要炒起諾士郡都冇難度，讓到2球照捧2.05倍「讓主」啦！（開賽時間：周三凌晨2:45）
英甲諾士郡開咧1和3負

利物浦由季前熱身賽到英超開咧首兩戰狀態一直極佳，踢咗9場贏足8場兼只失2球，其中聯賽兩戰全勝之餘更1球未失，係自08至09年球季以嚟，開局最好嘅一季。今場對手只係甲組仔，而且周末又要對曼聯，紅軍當然會派副選上陣練吓兵，不過呢班「後備」都唔嘢小o架！前線有波連尼壓陣，佢同佐敦伊比上周為U21隊上陣對曼聯U21都分別取得進帳，加埋有創造力強嘅祖阿倫、路爾斯阿拔圖同擅長高速突擊嘅史達寧，今場面對次級對手當然要數番幾粒證明身價啦！

同紅軍啱啱相反，諾士郡喺今季英甲嘅開局慘不忍睹，踢咗4場只得1和3負嘅劣績，而且已經失咗8球，今次仲要對住利物浦，條防線真係凍過水！何況主力前鋒希尼斯受傷後仲未復出，今場佢哋睇怕要吞蛋喇。