AC審判日大晒冷

猪拉多纳

阿里基保飯碗 喪攻燕豪芬

歐聯附加賽次回合重頭戲，ＡＣ米蘭主場鬥燕豪芬，今仗將成ＡＣ教練阿里基嘅「審判日」，老闆貝魯斯干尼下密旨，若球隊出局就會攞佢祭旗。阿里基唔想一開季即失業，實在不容有失，阿里基手上最強武器始終係射手巴洛迪利，應會盡量發揮進攻強項，減輕防守壓力。首回合打和1比1，燕豪芬失作客入球亦冇得退縮，陣中年輕球員勝在體力充沛，拚勁十足，可望撕開主隊防線，首選1.68倍入球大。

（有線61及201台周四凌晨2時45分直播）

阿里基同貝魯斯干尼關係欠佳，過去兩季不時傳出換帥消息，兩個月前阿里基更幾乎轉教羅馬，但由於球會莫財，ＡＣ成績唔算差，阿里基擁有唔少支持者，老貝唔敢貿然炒佢。不過ＡＣ喺意甲開鑼戰不敵升班馬維羅納，如果歐聯出局，將連累球會損失最少3000萬歐元收入，老貝就有大條道理請阿里基食無情雞。
傷疲盡起火力提升

雖然教練執包袱屬平常事，但阿里基絕對唔想衰喺「敵人」老貝手上，基於內部「矛盾」，阿帥唔會甘於死守0比0晉級。事實上，ＡＣ最弱就係防守，首回合及上仗聯賽，都係領先下，分別被扳平及倒輸，阿里基應該學精，今仗以攻代守，入多幾粒保勝果，先至係上策。巴洛迪利威力有幾大已毋須多講，羅賓奴已傷愈復出，奇雲保定傷勢亦無大礙。新加盟嘅安德列普利亦值得留意，呢位「新派路」首回合後備上陣，大大改善中場組織力，上仗聯賽更入波，預料今場會擔正，進一步提升ＡＣ火力。
朴智星專破ＡＣ大門

燕豪芬首回合表現更勝ＡＣ，製造唔少威脅埋門，呢班波重用年輕球員，呢班生牯仔體能強、速度快、技術出眾，韋拿杜姆、馬達夫斯、阿當馬希皆被譽為新一代彗星。唔好忘記仲有南韓名將朴智星壓陣，佢曾於05年歐聯4強為燕豪芬射破ＡＣ大門，3年前亦助曼聯作客3比2擊敗ＡＣ，堪稱ＡＣ剋星，有佢在陣，隊友信心都大啲。燕豪芬今仗首要目標係入波，抵消首回合失嘅作客入球，或一開波就反客為主，同ＡＣ駁火。