AC燕豪芬新星「大」激鬥

猪拉多纳

喺歐洲足協巧妙嘅賽制「安排」下，歐聯附加賽出現唔少頂級戲碼，好似AC米蘭同燕豪芬今晚次回合就要繼續打生打死。其實小弟都好希望見到呢兩隊同時殺入分組賽，因為大家都有唔少令人驚喜嘅頂級新人，好似艾沙拉維、巴洛迪利、韋拿杜姆同薩卡利亞巴卡利4個「90後」都係好波之人。首回合打成1:1未分高下，今晚呢班超新星肯定打甩髀，1.68倍入球大抵玩！

（有線61及201周四凌晨2:45直播）
巴神變身進攻中場交到貨

首回合兩隊踢成1:1，AC上場作客燕豪芬表現唔錯，教練阿里基將巴洛迪利改造到有啲似進攻中場，「巴神」亦都交到貨，更曾經有一次妙射中楣。相信最令班AC球迷開心嘅係，上季尾一度狀態低沉嘅艾沙拉維，季初表現似乎返晒嚟，佢同巴洛迪利好有默契，加上新加盟嘅中場安德列普利表現對辦，「紅黑兵團」火力唔使懷疑。唯一隱憂係後防始終唔穩陣，門將艾比亞迪首回合蝦碌，今場要佢保持不失都唔易。
燕豪芬要爭作客入球焗攻

燕豪芬今個暑假雖然賣走大批球星，但唔可以唔服佢哋嘅青訓力量。新人輩出下，90年出世嘅韋拿杜姆同96年出世嘅薩卡利亞巴卡利已經係球隊支柱，畀唔少歐洲大球會吼實，如果燕豪芬不幸入唔到歐聯分組賽，呢兩位超新星隨時會畀人撬走。

講到底，燕豪芬一向都係崇尚荷蘭足球進攻風格，何況佢哋首回合失咗個作客入球，今場點都要有波入先至有機會晉級，咁即係要同AC搶攻，咁入球大就有計啦！
頂占筍盤：AC米蘭（入球大）

猪拉多纳