愛華頓搵「史提芬」出氣

猪拉多纳

愛華頓今晚喺英格蘭聯賽盃第2圈主場對「英甲仔」史提芬納治，兩軍實力有明顯差距，相信呢鋪就係「拖肥糖」力爭主場開齋大捷嘅時候，即使讓2球2.18倍「讓球主勝」要支持。

（開賽時間︰周四凌晨2:45）

雖然仲未打開英超勝利之門，不過愛華頓頭兩仗演出一啲都唔失禮，如果上場聯賽唔係西布朗門將賓科士打「上身」，「拖肥糖」話唔埋已經拎到今季主場首勝。「拖肥糖」今季雖然冇咗莫耶斯領軍，好彩球會搵嚟同樣識得以「蔗渣價錢踢出燒鵝味道」嘅馬天尼斯執教。應付盃賽有一手嘅馬天尼斯上季揸住隊韋根都可以捧走足總盃，今季班手足換成費蘭尼同巴尼斯等實力更高球員，加埋新加盟前鋒干尼同當弗嘅小將巴克里，大把籌碼畀佢發揮，今晚都係時候贏番場漂亮勝仗。
史提芬納治剛終止連敗

史提芬納治上仗靠占士鄧尼喺比賽末段入球，得以1:0擊敗諾士郡終止聯賽三連敗。賽後呢位入球功臣豪言球隊有力砌低愛華頓晉級，之但係佢好似唔記得自己隊波上季首席射手艾堅斯同守將塞利繼續養傷，今晚對住上場對西布朗射咗22次門但一球入唔到，谷到成肚氣嘅愛華頓想偷雞都幾難。