決戰布拉格 唔係車毀就係仁亡

猪拉多纳

哥帥寸王細不兩立

今晚歐洲超級盃，上季歐聯冠軍拜仁慕尼黑，於捷克布拉格中立場出戰上季歐霸盃冠軍車路士，兩軍新帥哥迪奧拿同莫連奴冤家路窄！兩個互相熟悉嘅對手，背負沉重唔輸得嘅壓力，分別帶領兩支仲未磨合好嘅球隊，今場預期會比較保守，黑柴推介1.95倍入球細。

（有線61及201台周六凌晨2時45分直播）
硬推巴塞踢法 攻力驟減

哥迪奧拿同莫連奴昔日分別帶領巴塞隆拿同皇家馬德里，喺西甲打生打死，今次係兩人第16次對決，計往績，哥帥暫時以7勝5和3負領先。不過喺佢離開巴塞前嘅一季，兩次對住莫帥都贏唔到，而且佢嘅所有榮譽都係喺巴塞取得，比起去到邊威到邊嘅莫連奴，成就仍然稍稍遜色。兩人今季都係新官上任，今場歐超盃大家都唔衰得。

哥迪奧拿接咗上季贏盡錦標嘅軒歷基斯帥印，由季前熱身賽、德超盃到踢咗4輪聯賽，球隊攻守表現都不及上季，呢位12歲開始喺巴塞少年隊成長嘅教練，腦海中巴塞式踢法根深柢固，硬推落拜仁度，令一眾上季踢到曉飛嘅球星無法盡展所長，上場聯賽更玩輪換收起半隊主力，搞到失分畀弱旅弗賴堡，外界批評聲音愈嚟愈響，哥帥承受沉重壓力。事實上，拜仁喺佢手上進攻線雖然多咗人，但太着重控球同短傳中路入滲，無法保持上季嘅進攻效率。
不滿鋒線組合 寧願穩守

至於莫連奴重掌車路士帥印，由佢今夏一直追逐朗尼．近期又斟伊度奧，就知對手上嘅鋒線人選有幾不滿，費蘭度托利斯上仗只任後備，到上陣時亦碌碌無為，丹巴巴亞同盧卡古都不受重用，上場聯賽作客曼聯，莫帥索性擺無鋒陣，刻意主守下取得0比0嘅滿意賽果，今場對住上季「3冠王」拜仁，料會照辦煮碗，以守為先。

過去10屆歐超盃有一個有趣數據，每逢單數年都由上屆歐聯冠軍捧盃，相反雙數年就由上屆歐霸盃盟主稱雄，今屆係單數年，莫非預示獎盃將落入拜仁之手？但觀乎雙方目前都未執掂隊波，今場估計會係拉鋸戰，入波相信唔會多，入球細好路。　■