狂熱紅躉唔係人咁品 惡霸浦和「大」開殺戒

猪拉多纳

好多人以為日本人守禮講規矩，覺得佢哋啲球迷會好文明，其實樹大有枯枝，日職有啲擁躉都好野蠻，例如今日主場對新潟天鵝嘅浦和紅鑽，佢班Fans有唔少暴徒，上星期就有4條友搞事畀差佬拉咗。（開賽時間：周六下午5:00）
4件紅鑽粉絲搞事被捕

講真，今日嗰3場日職直播波，都唔及呢場話題咁多。上個禮拜浦和作客贏清水2:0場波，就發生咗浦和Fans向清水隊巴掟煙花、炮仗嘅事，其中有4個「紅躉」仲失控到推撞啲保安被捕，早兩日浦和就宣布將呢幾條友列做不受歡迎人物，暫時禁止佢哋入場睇波，至於終極處分係乜，仲要等法庭判咗再決定。
天鵝14次造訪埼玉輸12次

有班狂熱嘅擁躉其實係好事，尤其主場出擊，嗰種霸氣唔係咁多客隊頂得住，對自己班球員亦會產生一種無形嘅推動力，所以浦和今季响日職打咗11場只輸過畀橫濱同清水，贏嘅7場波裏面，開咗兩次「主其他」，有6場總入球4球或以上，由呢啲數據就睇到，呢支「日本紅魔」係典型嘅土豪劣紳，响地頭惡晒。

天鵝今季開壞咗個頭，家陣响中游唔上唔落，乜都冇佢份，而且以往14次作客埼玉縣，只和過兩次其餘輸晒，今場波博佢哋贏真係好抿水。但係佢哋早輪由浦和簽咗件前鋒田中達也之後，成個攻擊環節有生氣過以前，今日有權入波，1.62倍入球大幾穩陣，不過浦和例牌主場發癲，1.63倍主W一樣咁穩，狠啲仲可以博2.75倍「讓球主勝」添。