利物浦弗爆砌曼聯 料大手交易

猪拉多纳

計卡士、狀態、戰鬥力，今場「雙紅會」肯定係近年最接近嘅一次，入波唔會少！英格蘭「國家打吡」利物浦主場鬥曼聯，紅軍以近4年最佳聯賽開局狀態迎敵，惜高路托尼有傷，難再保清白之身；紅魔鬼近4次鬥紅軍場場入2粒，尹佩斯又弗爆，捧大盤！

（now 621周日晚8時30分直播）
謝拉特遇魔特別醒神

利物浦同曼聯，屬英格蘭兩間最成功球會，進入英超時代，紅魔鬼壟斷聯賽，係奪得英格蘭頂級聯賽最多球隊（20次）。利物浦05年雖亦爆冷擸走歐聯，但聯賽碌碌無為卻係事實，近年連歐聯都冇得打，已被踢出「big4」行列。不過，無論呢個Match up幾時、喺邊度舉行，又或者雙方實力、狀態如何，都完全唔重要；為名譽、為面子，大家落到場都會搏盡，戰情必定緊湊精彩。

本季紅軍轉運，開季2連勝，加上於英聯盃過關，隊長謝拉特話佢哋一班隊友都覺得本季唔同咗，依家信心爆棚，而曼聯傳奇領隊費格遜已退休，由莫耶斯接掌，對手「降呢」更增加紅軍爭勝決心。雖然蘇亞雷斯仲坐緊波監，但史杜列治勁勇，連續3場有波入，而且菲臘比古天奴表現搶鏡，加上謝拉特對親紅魔鬼都踢到曉飛，近6次佢有出場嘅聯賽較量，「神奇隊長」入咗4粒，紅軍今仗好難冇波入。後防方面，利物浦新季2場聯賽都冇失波，只因新門將米洛列特頻頻「神救」；但大將高路托尼有傷，隨時同新左閘阿里施蘇高齊齊倦勤，未必頂得住紅魔猛攻。
尹佩斯拍朗尼火力猛

費格遜一去，莫耶斯接手壓力好大，但紅魔鬼畢竟基業厚，就算莫帥卡士唔夠，曼聯表現唔會差得去邊。至於利物浦唔會好似車仔上仗去到奧脫福咁縮後踢，尹佩斯又有大把機會搵食，再加埋朗尼已疊埋心水留隊，將會重新專心殺敵。雙方入波條件多到瀉，將會繼近9場對賽7次開大後，再開出大盤。