港歐好波 無間斷14個半鐘直播

猪拉多纳

Super Sunday 睇個夠!

踏入九月第一日，本地及歐洲球壇爆發新球季第一個高潮，本地兩大勁旅東方沙龍、南華下午初登場，黃昏有今季首場西甲早場皇馬陪你食晚飯，夜啲輪到兩場英超大戰「雙紅會」利物浦鬥曼聯及「北倫敦打吡」阿仙奴對熱刺，最後仲有西甲班霸巴塞隆拿壓軸亮相，連同多場德甲、荷甲及葡超，呢個Super Sunday電視直播賽事達14個半小時，睇少任何一場隨時都係你損失！
艦隊亂七八糟點吔包

今晚西甲超早場，由皇家馬德里坐鎮巴拿貝主場迎戰畢爾包。雖然皇馬星光熠熠，但在新戰術下個個都踢得唔開心，連以往入波當食生菜嘅王牌射手C朗，至今仍未開齋。相反，畢爾包開季連贏兩場，眾將信心爆棚，「銀河艦隊」讓唔起畢軍2/2.5球，下盤有買趁早。

（now 632周日晚6時直播）

皇馬一向不乏球星，如何令呢班大帝開心踢波，係一門高深學問。上季教頭莫連奴以鐵腕治軍，促使內訌不斷，今季搵來順得人安察洛堤帶隊，會長皮里茲買乜人返來，佢諗都唔諗全部炒埋一碟，實唔會得罪老闆喇，但中前場一口氣用晒奧斯爾、艾斯高、C朗、莫迪歷，削弱防守之餘，太多核心欠主次之分，反令進攻亂七八糟，射手C朗愈心急愈開唔到開齋，之前兩仗聯賽只能險勝有辦你睇，中場靈魂奧斯爾上仗被換出時，仲嬲到直接返更衣室，門將隊長卡斯拿斯又繼續淪為後備，個個都唔開心，點樣踢好波呀？
畢爾包連勝返正軌

上季畢爾包賣走大佬查維馬天尼斯，搞到群龍無首，加上「瘋子教頭」比爾沙同球員不和，成季表現渾渾噩噩，但今季華爾維迪重掌帥印後，呢班「巴斯克子弟兵」即刻生猛晒，其實佢哋前季殺入歐霸盃及西盃決賽，底質唔曳，只要團結就可重上正軌，開季兩連勝絕非僥幸。當然，皇馬質素遠勝畢爾包，但「銀河艦隊」仍處於磨合期，問題多多，難贏氣勢如虹嘅「巴斯克雄獅」三球，一於捧下盤。