阿仙奴 熱刺「大」打出手

猪拉多纳

北倫敦打吡 世仇碰頭！

夏季轉會窗進入倒數階段，阿仙奴繼耶耶辛洛高後，日前再免費翻兜中場法米尼，至今一個崩都未使過，兼夾傷兵成籮，今晚喺酋長球場惡鬥「億萬大軍」熱刺難言穩勝，之不過兩軍喺「北倫敦打吡」例牌開入球騷，咪諗咁多，簡單啲捧個1.62倍大啦！

（now621台及廣東體育周日晚11:00直播）

阿仙奴依家有兩樣嘢多，第一當然係「險簽」多啦！今夏同「兵工廠」扯上關係嘅球員多不勝數，唔計有吹水成分嘅卡斯拿斯，最近就有紐卡素中場卡比耶及華倫西亞門將古亞達，有指雲格嫌對方叫價太高所以放棄收購，為「險簽名單」再添兩員猛將。第二就係傷兵多，阿迪達、華美倫、阿歷士張伯倫、戴亞比全部打柴，原本預計抖3星期嘅普多斯基，日前證實傷勢比預期嚴重，最少要抖10個星期，今晚又唔使預佢喇。
基奧特係倫敦效率王

雖然兩「多」搞到雲格頭都痕，但佢都講明今場會照攻同熱刺死過：「北倫敦打吡擁有獨特嘅氣氛，令大家落到場充滿進攻意識，充滿對勝利嘅渴求。」咁又係喎，翻查紀錄，兩軍近7次聯賽會師酋長球場，合共攻入36球，場均有逾5球交收；前鋒基奧特踢倫敦打吡仲特別醒神，至今喺英超攻入嘅13球，其中7球係喺同市打吡取得，效率為歷年「廠仔」之冠。

相反，「廠仔世仇」熱刺繼簽入荷西保連奴、蘇爾達杜後，再以破球會轉會費紀錄3,000萬鎊簽埋羅馬鋒將拉美拿，連埋布加勒斯特星隊中堅捷利捷斯、阿積士中場基斯甸艾歷臣日前相繼加盟，熱刺喺今夏已投入逾1億鎊，1個巴利換到咁多件猛將，仲要玩嘢搞到孤寒佬雲格買唔到人，抵到爛啦！既然連殘陣嘅阿仙奴都學人喪攻，試問陣容鼎盛嘅熱刺又點會縮沙先，大家等睇入球騷啦！
半全場都旺入球大

‧雙方近14次聯賽對碰，其中13次總入球超過2.5球。

‧雙方近7次聯賽會師酋長球場，總共出現36個入球。

‧阿仙奴近5次喺主場上演「北倫敦打吡」，全部開出「半場大」。