PSV阿積士大火併

猪拉多纳

名門第二梯隊荷乙鬥攻

荷乙開快車，今晚一口氣進行十場比賽，阿King重心推介「青年國家打吡」燕豪芬青年隊（PSV）主場對阿積士青年隊，年輕球員當然想喺打吡場合攞威，必然鬥攻，一於捧大盤。

（周二凌晨2時開賽）

眾所周知，燕豪芬及阿積士成年隊屬於荷蘭球壇兩股最強勢力，一向鬥到你死我活，甚至青訓系統內都有呢種視對方為死敵嘅思想。兩軍青年隊首次荷乙碰頭，大戰氣氛濃厚，兩隊都渴望贏出今場極具歷史性意義嘅比賽，後生仔心高氣傲，應會鬥攻爭勝，開出入球大機會自然較高。

今季荷乙加入三支甲組隊青年軍，除咗燕、阿二軍外，仲有川迪青年隊，暫時燕豪芬青年隊表現比較遜色，五戰僅一勝，最近更兩連敗，但要留意呢兩場都係作客。今仗返回自己地頭情況應該有好大分別，一來有主場之利，二來具「國家打吡」意義，「燕青」當然要喺fans面前揚威，尤其係阿積士青訓享譽球壇，「燕青」正好趁今仗擊敗對手，證明佢哋小將一樣掂。
阿基里斯衰波要反

阿積士傳統重視青訓，青年隊極具質素，部分球員有甲組比賽經驗，上仗力挫川迪青年隊，盡顯青訓「一哥」本色。遇上死對頭燕豪芬青年隊，必然搏命保金漆招牌，唔會求和咁衰仔。

另一支荷乙新軍阿基里斯表現完全唔掂，四連敗狂失十三球，今仗作客奧斯，睇怕凶多吉少。最後威廉二世狀態大勇，作客對住頹勢嘅幸運薛達，可望再添食，威廉二世小讓平半，要上盤。