英格蘭咬魚腩賀新帥

猪拉多纳

「幼獅」新帥上任三把火！今晚英格蘭U21坐鎮主場迎戰摩爾多瓦U21，展開U21歐國盃外圍賽嘅征途，「幼獅」聘得名宿修夫基掌舵，佢亦唔敢怠慢，召入曼聯雙星韋費特沙夏同連格，火力全開，誓要搵魚腩摩爾多瓦U21祭旗省靚招牌，「讓球主勝」讓兩球都捧得過。

（now 621周五凌晨2時45分直播）
徵召紅魔雙星顯決心

英格蘭U21近年喺皮雅斯帶領下愈踢嚟愈曳，今夏U21歐國盃決賽周三戰皆北羞家出局，阿皮亦告落鑊。「幼獅」最大問題係心理質素差，大賽發揮唔到水準，上仗喺冇壓力嘅熱身賽就豪派蘇格蘭六蛋。上月尾英足總委任名宿修夫基接掌帥印，呢位前米杜士堡領隊當然唔想失威喇，立即徵召曼聯前線新星韋費特沙夏及連格，其中連格喺夏天嘅亞洲之旅頻有士哥，亦擅於為隊友鋪橋搭路，佢同韋費特沙夏喺邊線快到甩轆，配合新特蘭長人中鋒域咸中路搶點，定必擦出火花。

摩爾多瓦U21一向遇強隊即腳軟，之前對住英軍細佬威爾斯U21都輸波收場，況且呢場係「幼獅」首場外圍賽，挾住大炒蘇格蘭嘅餘威，修帥希望喺自己地頭大勝一場響頭炮，鬥心唔使懷疑，「讓球主勝」捧得過。

猪拉多纳