飲食之星跑質夠贏

猪拉多纳

　　今日祝各位馬友大獲全勝！有謂頭威頭勢，有時唔可以唔信，但阿棟亦要奉勸一句，千祈唔好係又買、唔係又買。諗真啲，今日先至9月8日，幾時得嚟下年7月6日收鑼，咪怪我恃老賣老，都係睇定啲好。

　　第六場四班1200米。「嫡愛」蔡神仙年輕馬，年長1歲，有冇進步？冇人敢寫包單，唯一肯定，此程最有根據，之但係，以佢上季輸畀「奇無極」一役，將來必要跑1400米或以上路程，依家係靠少少新鮮感搭夠。

　　講到形勢，今場似係四班遺材賽，難聽啲講，海軍鬥水兵，佢應該有得揮，況且，排好位點都着數啲，唔奢望贏得晒，賠率有錢分，博P已不錯。

　　今季隨時上一班

　　第八場三班1200米。唔係吹水，「飲食之星」進度良好的話，今季隨時上一班，現時在三班，好似大人同細路哥玩。至於進度如何，呢場可能有小小風險，因為未知質新馬操起未。

　　不過，信「飲食之星」實力高強，排檔又幫埋手，用得潘頓唔會「揸流攤」，靠級數夠掃。

　　第十場二班1400米。「君子一言」都算馬主好心地，咁耐唔贏，等足3年有多，仍然未有退役意思，方仔作為練馬師，冇理由唔識做，搏得一定搏，而呢類馬，難得季初早早跑得，操練工夫又冇問題，真係還得神落，對準最佳路程，掹到強手壓陣，實會作出重擊。(陳華棟 資深評馬人)