喀麥隆炒利比亞賀重生

猪拉多纳

「非洲雄獅」浴火重生！喀麥隆喺今屆世盃外受「內亂」困擾，導致表現起伏不定，好在經國際足協出手後終於平息紛爭，佢哋今晚喺I組最後一輪主場鬥利比亞，雖然和波都夠出線，但家陣班人士氣爆燈到撳都撳唔住，撐硬2.28倍「讓主」。

（開賽時間：周日晚10:30）

「獵豹」伊度奧早就不滿喀麥隆足總貪腐問題嚴重，直到今年6月政府更被揭發干預足總事務，搞到被國際足協勒令禁賽，外界仲曾經擔心今場踢唔成添，好在，喀麥隆宣布籌組新委員會整頓歪風後終獲解禁。
利比亞群龍無首

喀麥隆「內亂」平息過後，「喜事」隨即接踵而至。佢哋之前作客0:2不敵多哥場波，後者被發現派遣違規球員落場，喀麥隆最終獲賽會改判贏3:0，並得以10分進佔榜首，令出線形勢變得主動。「不屈雄獅」目前諸事順遂，韋保、祖爾麥迪比、麥比亞成班猛將今場又有「獵豹」領軍搏殺，贏兩球係最低消費。

另方面，利比亞領隊阿比殊嘅細佬喺日前離世，大戰當前要請假為屋企人辦理身後事，勢必影響國家隊備戰進度。至於喺前線擔大旗嘅阿密特蘇韋據悉膝頭有傷倦勤，單靠目前冇班落、年屆34歲高齡嘅阿密特奧士文數胡，略嫌火力唔夠。再者佢哋打慣穩守突擊，今場為求出線要焗攻，演出隨時大打折扣，信唔過。