美國哥斯達黎加 有望提早去巴西

猪拉多纳

中北美洲區賽事亦有機會定出直接出線球隊，目前排榜首嘅哥斯達黎加只要今輪作客擊敗包尾嘅牙買加，同時間墨西哥未能擊敗美國、洪都拉斯輸畀巴拿馬，哥斯達黎加便可繼06年後再次進身決賽周。由於牙買加分組賽7戰未贏過，肯定無緣晉級，而且佢哋對上6場國際賽只入1球，攻力疲弱，難對哥軍構成威脅，客隊全取3分機會甚高。

（周三早上8時開賽）
墨西哥最後掙扎

講到今輪戲肉肯定係美國主場鬥墨西哥，墨西哥自94年開始連續5屆亮相決賽周，而且5次都能打入16強，成績斐然，不過今屆外圍賽表現卻差強人意，完成7輪分組賽只得8分排第4，如果以此排名過終點就會失去直接出線資格。墨西哥上輪主場對洪都拉斯反勝為敗，賽後正式辭退領隊迪拿托利，改由上年贏得倫奧男子足球金牌教頭泰拿接手，希望可以一洗頹風。

美國現時形勢比墨西哥好，如果佢哋今仗全取3分、同時間洪都拉斯於主場擊敗巴拿馬，美國便可連續7屆打入決賽周，可惜前鋒艾迪杜里、後衞馬特比斯拿和謝夫甘馬倫今仗需要坐波監，中場米高巴特利又有傷，戰鬥力恐會打折扣。主帥奇連士文即時補選了中場祖哥朗拿、巴特戴維斯、荷西托利斯及後衞葛特臣入伍，加強兵源調動。

（周三早上8時06分開賽、馬會網上文字直播）