國足再爆馬來西亞

猪拉多纳

炒完新加坡信心返晒嚟

英格蘭世界盃出線形勢一般，不但球迷關注佢哋嘅情況，連世界各地菠菜公司都驚英軍出局。英格蘭向來係名氣球隊，喺大中華地區極受歡迎，佢哋缺席08年歐洲國家盃，投X額真係縮晒水。呢班波長期有捧場客，如果2014世界盃又冇份，對菠菜界人士嚟講絕對係災難。
應以德國做榜樣

今日同大家講吓中國足球先，中國東北球員普遍神高神大，肥叔真係好唔明點解班領導之前搵個西班牙教頭（甘馬曹）帶隊，要佢哋打地波短傳，班球員技術有限，盲目跟風打西班牙式足球，根本唔係嗰回事。若果真係要學一支歐洲國家隊，國足應以德國為榜樣，有時唔係話邊隊勁就跟邊隊，都要諗吓自己嘅特性，除非學晒人哋整個系統由青訓做起啦，否則都係難有作為。

國足上場大炒新加坡，打出自「615中國足球慘案」以來最漂亮嘅一場勝仗，甘馬曹離開後打得簡簡單單仲實際，真係幾諷刺！中國經過大敗畀泰國一役後，領導層高度重視足球發展，富豪球會廣州恒大亦全力配合，起碼依家隊內氣氛好番好多，今次再喺主場迎戰另一支東南亞球隊馬來西亞，國足瓣瓣都高過對手，好有機會再次大勝！

（周二晚7時35分開賽）