意大利「非洲武士」 搶W闖巴西!

猪拉多纳

捷克老將孭飛實力曳

「非洲戰士」撐起意大利，強闖巴西！呢支4屆世盃冠軍今晚喺歐洲區外圍賽B組主場迎戰捷克，只要贏波就可以出線巴西世盃決賽周，「藍衫軍」今仗有前鋒巴洛迪利復出掛帥，賽前更獲意大利首位黑人部長打氣，配合其餘兩位「非洲外援」奧邦拿同艾沙拉維，呢股「黑勢力」絕對唔係人咁品，2.4倍「讓主」博得過！（now633及660台周三凌晨2:45直播）
意首位黑人部長勁讚巴神

意甲球壇近年發生唔少種族歧視事件，呢樣嘢對身為意大利移民部長基恩吉嚟講絕對唔陌生，事關佢都曾經畀人掟蕉。適逢「藍衫軍」備戰今場世盃外圍賽同基恩吉住埋同一間酒店，日前大軍就拉隊拜會呢位女部長。基恩吉亦勉勵佢哋要為意大利未來而努力，仲特別點名稱讚對抗種族歧視不遺餘力嘅「巴神」：「巴洛迪利同我一樣，佢都係喺度開創緊新道路，雖然我哋面對重重難關，但絕對唔會放棄。」

事實上，除咗擁有加納血統嘅巴洛迪利，「小法老」艾沙拉維同埋後防主將奧邦拿都係嚟自非洲，呢3位仁兄唔單止係國家隊主力，亦係所屬球會AC及祖記嘅新世代核心，質素夠晒保證，家陣仲獲黑人部長打氣，呢班「非洲戰士」發起威上嚟，的確唔係人咁品！
捷克上仗主場輸畀阿美尼亞

係，雖然「藍衫軍」守將阿比迪同盧卡安東尼利齊齊因傷退隊，但補選番柏斯哥迪迪施維斯查，戰鬥力影響唔會太大。最重要嘅，係中場蒙杜利禾及前鋒奧斯華度齊齊坐完波監，畀到主帥柏蘭迪利更多選擇。佢哋目前以7戰17分排喺榜首，只要今晚贏波，就唔使理其他賽果，可以攞到進軍巴西入場券，落到場肯定打甩髀。

對家捷克家陣排喺小組第3，實力麻麻，上星期五仲夠膽死喺主場輸畀阿美尼亞，始終班波踢到依家都仲係靠老兵施治同路斯基支撐，佢兩個今季開咧以嚟都有多少跌Watt，整體戰鬥力自然今非昔比，即使捷克仲要爭次名攞附加賽資格，恐怕都係有心無力囉。
乜都玩錦囊

柏帥進取玩埋半主+主主

意大利喺今屆世盃外分組賽主場3戰全勝，證明佢哋地頭威力好強。領隊柏蘭迪利係新派領隊打法相對進取，唔會慢慢磨，睇番佢哋3場勝仗都係半場已經領先，2.02倍半主同2.1倍半全場「主主」都值得一試o架！
Data King

藍衫軍對賽「細」如破竹

‧意大利係歐洲區7支不敗球隊之一。

‧兩軍近6次交手有4次開入球細。

‧意大利分組賽主場3戰全勝，共入6球僅失1球。