烏克蘭食住個勢 追打「冇牙三獅」

猪拉多纳

「冇牙獅子」難發惡！英格蘭今晚喺世盃外歐洲區H組作客烏克蘭，鋒線繼王牌朗尼打柴後，韋碧克又黃牌夠數要坐波監，就連史杜列治都歸隊無望，想靠「中年新秀」列基林拔單天保至尊？怕且好難喇，捧烏克蘭1.9倍平手盤坐和望贏。 （now621台周三凌晨2:45直播）
英格蘭齋靠「中年新秀」林拔

修咸頓射手列基林拔繼國家隊處子戰頂爆蘇格蘭後，上輪鬥摩爾多瓦又有斬獲，狀態唔錯，但值得留意嘅係呢兩場波都係喺溫布萊踢，今趟佢首度遠征基輔，表現可能冇之前咁標青。何況喺史杜列治宣布退隊後，領隊鶴臣講明唔會補選球員，換句話講除咗列基林拔，正箭頭得番迪科爾1個，但佢喺熱刺淪為替補，狀態成疑，如今英格蘭變成「冇牙獅子」，恐怕賽前揚言喺巴西世盃後退役，今晚將第100次代表國家隊嘅林柏特都難以力挽狂瀾。

相反，烏克蘭日前炒聖馬力諾9:0，過程輕描淡寫耗力唔多，領隊科文高喺下半場早段已收起舒夫卓克同泰摩斯卓克，過多個骨連翼鋒耶莫蘭高都換走埋，擺明留力撼英格蘭。再者，烏克蘭最近4場喪入15球兼冇失波，絕對係攻守兼備，仲要有成68,000球迷做後盾，英倫Fans得嗰2,000人，平手盤真係幾抵買o架！