美國 墨西哥鬥踢守「細」波

猪拉多纳

中北美雙雄齊失威

美國同墨西哥一向都雄霸中北美洲，對上2屆世界盃中北美洲區第4圈分組賽，都係呢兩隊包辦頭2位。點知今屆佢哋齊齊失威，冇晒中北美洲霸主風範。聽朝兩軍交手，美國只要贏波同埋巴拿馬失分就肯定出線，不過佢哋冇咗多件主力，唔係咁易喺啱啱換帥嘅墨西哥身上入波，大家都要力求穩陣，1.62倍入球細抵玩。

（開賽時間：周三早上8:06）
墨西哥易帥部署求穩

美國上仗輸畀哥斯達黎加，結果將小組榜首位置拱手相讓，更大鑊嘅係前鋒艾迪杜里、守將謝夫甘馬倫、馬特比斯拿3將今場要停賽，中場米高巴特利賽前亦報稱有傷。雖然球隊已經補選中場哥朗拿、巴特戴維斯、荷西托利斯、守將葛特臣，但一下子冇咗4件主力，實力梗係大受影響，想入多粒都唔易。

墨西哥上場輸畀洪都拉斯後，隨即宣布辭去領隊迪拿托利，改由泰拿領軍。呢位新帥上年帶過墨西哥喺倫敦奧運奪金，屬有料之人，有助重整球隊。不過射手查維亞靴南迪斯因狀態不足，上仗冇得打正選，前線得番杜斯山度士的確孤掌難鳴，加上今場仲要作客，睇怕佢哋都係先做好防守，唔會冒險搶攻。