哈化主場出擊「特」別醒

猪拉多纳

哈化獲「醫神」打救！所謂「醫者父母心」，雖然禾法特係拜仁軍醫，不過睇見舊部施巴斯坦蘭甘有難，「醫神」諗都唔諗就醫番好呢位哈化守將，配合埋決心搶番個指揮官席位嘅朗尼希巴臣復任正選，哈化今晚喺「無敵主場」恭候史特加可睇高一線，哈化讓平半，撐上盤。

（有線61及201周六凌晨2:30直播）
蘭甘獲醫神打救奇迹復出

施巴斯坦蘭甘早排大腿肌肉撕裂，一般嚟講呢種傷要抖兩星期至兩個月不等，不過呢位拜仁舊將同哈化軍醫商量過後，決定搵拜仁「醫神」打救，禾法特前日只係喺施巴斯坦蘭甘隻腳同背脊各打一針，呢位哈化戰將就可以即刻復操，今晚仲可以候命添，無疑係哈化嘅一大喜訊。

哈化攻擊中場鮑祖漢因十字韌帶撕裂長抖，朗尼希巴臣將會同新兵施格斯爭正選，當中喺去季攻入18球兼交出14次助攻嘅朗尼希巴臣新季失寵，今仗仲唔出盡渾身解數取悅教練盧侯卡爾咩！對手史特加上仗贏賀芬咸6:2開齋，不過佢哋計埋歐洲賽在內，近3場作客波全部輸晒，今鋪造訪對上19場主場賽事未輸過嘅哈化，仲可以有咩期望吖？