巴利+C朗 Vs 墨西哥孖寶 艦隊鬥潛艇盛「大」公演

猪拉多纳

今輪西甲焦點，當然落喺「標王」加里夫巴利身上啦！皇馬今晚作客維拉利爾，「大聖爺」肯定披甲，而且C朗「及時復出」，拍住想爭番啖氣嘅賓施馬，肯定同浮番上西甲後火力全開嘅「黃潛」做入球騷，熱捧1.48倍入球大！（now632台周日凌晨4:00直播）

皇馬經過今輪國際賽後「損失慘重」，除咗原有傷兵沙比阿朗素、基迪拉同華拉尼，就連艾斯高、馬些路同法比奧干查奧都加入十字軍，認真大鑊！好彩，新援加里夫巴利日前歸隊後極速跟操，何況佢早前已經為威爾斯後備上陣33分鐘，狀態已經慢慢提升，主帥安察洛堤仲講明會派佢落場，但正選定後備就到時先算！
維拉利爾火力勁過皇馬

今場波嘅另一位主角，就係喺法國國家隊經歷咗1,217分鐘入球荒，畀Fans噓爆嘅賓施馬！《馬卡報》話賓施馬體會到人情冷暖，明白球會先至係真正歡迎佢嘅地方，所以今場肯定會搏盡報答球迷喎！仲有呀，葡萄牙上仗對巴西，C朗賽前無啦啦話有傷，不過今晚又突然「傷愈復出」，係真係假都好，有巴利+C朗+賓施馬，「艦隊」想入少粒都難啦！

今季升番上西甲嘅維拉利爾開季3戰全勝，雖然話對手都唔係勁旅，但佢哋比皇馬仲要入多2粒，絕對唔可以睇小佢哋嘅鋒力，除咗巴塞出身嘅前鋒杜斯山度士今季「大翻身」，佢位同鄉查維亞阿基路亦開埋齋，有呢對墨西哥孖寶壓陣，配合法國射手佩比，呢個三叉戟都唔弱o架，今晚就算輸都好，都有力隊番皇馬一、兩粒o架！
Data King 兩軍近戰例開入球騷

連熱身賽在內，皇家馬德里近8場全勝，其中5場至少攻入3球。

皇馬近8戰開出6次半場入球大。

維拉利爾近4場全部開大，近4戰亦有3場開出半場入球大。