齊染「FIFA病毒」 紅魔 廠仔有喜有悲

猪拉多纳

「FIFA病毒」入侵英超?

一般球會嘅教頭，對於國際賽賽期多數抱怨連連，無事無幹還好，受傷返嚟就真係多得你唔少，傳媒就索性稱之為「FIFA病毒」。俗語有話「愈窮愈見鬼」，兵工廠相信最有體會，國際賽賽期前阿仙奴本身已有6名傷兵，依家再新加上路斯基、韋舒亞及禾確特3員，傷兵名單幾乎可湊夠一隊。好彩後兩者有望趕及今晚作客新特蘭，兼且奧斯爾及辛迪卡蘇拿都健康歸來，陣容不至天殘地缺，面對狀態、士氣均陷低潮嘅「病貓」，兵工廠應可小勝而回。

（now622台周六晚10:00直播）
尹佩斯食魚腩結束入球荒

同人唔同命，「FIFA病毒」反而暗助紅魔鬼。之前硬碰車仔利記，曼聯僅得1分，又傳出尹佩斯不滿莫帥嘅訓練方式，負面情緒籠罩球隊之時，一個短暫歇息正好等大家冷靜同反思，不失為一場「及時雨」。而尹佩斯之前喺英超「強強對碰」陷入入球荒，回歸荷蘭國家隊正好連續遇上魚腩部隊，2場3球重拾入球感覺。當然喺朗尼仍未復出，香川真司確係值得畀機會佢上陣，但人總有偏好，或者莫帥寧可食墨西哥「豌豆」亦唔鍾意食日本「壽司」呢？正如洪明甫警告朴主永想打出年世盃就要快離開兵工廠一樣，香川真司確係時候諗吓自己喺曼聯嘅前途。

（now621台周六晚7:45直播）

猪拉多纳