洛辛堡踩油上盤啱素

猪拉多纳

今晚有六十幾場波，難免花多眼亂，阿King誠意推介挪超班霸洛辛堡，佢哋一向人才鼎盛，為重奪聯賽冠軍，決心毋須懷疑，今仗作客有歐霸後顧嘅特林素，勝算甚高，小讓平半不容錯過。

（周一凌晨1時開賽）

今季挪超競爭激烈，不過異軍突起嘅史卓加斯特一輪虛火過後，終於畀洛辛堡迎頭趕上殺上榜首，並拋離史軍五分，聯賽剩番八輪，只要小心翼翼發揮穩定，相信冠軍非洛辛堡莫屬。對手特林素被歐戰所累，國內表現跌晒Watt，該隊上一次於聯賽贏波已經係六月尾嘅事，證明佢哋嘅陣容太單薄，難以應付兩線作戰，最慘係特軍殺入歐霸分組賽，嚟緊周中仲要作客英超勁旅熱刺，話佢唔分心就假，就算有地利都靠唔住。相反人強馬壯嘅洛辛堡心無旁騖，現時可專心衝擊聯賽及挪盃，況且近六次碰頭贏咗四次，擺明係食住特林素，上盤有1.98倍非常抵玩。
奧沙辛拿「+1」有「基」

至於西甲基達菲主場迎戰奧沙辛拿，兩軍開咧演出差強人意，不過奧沙辛拿當機立斷，怒炒教頭文迪列巴，並委任查維加西亞接掌兵符，首度領軍梗係要省靚塊招牌喇，一於捧有新帥效應嘅奧沙「讓球客勝」。最後巴甲山度士主場火併保地花高，山軍失去尼馬後演出反覆，有名將施多夫壓陣嘅保地花高挾住三連勝嘅威勢，作客贏埋唔奇，有得受讓咁筍梗係揀下盤。