前鋒唔留手後防多甩漏 貝迪斯華倫做大戲

猪拉多纳

今晚西甲尾場有貝迪斯迎戰華倫西亞，務求借主場之利打開聯賽勝利之門！貝迪斯上季以第7名衝過終點，進身歐洲賽，不過佢哋今季季初成績並唔理想，3戰只得1分，今晚雖然有主場之利，亦都冇必勝嘅把握，但對家華倫西亞亦唔好得幾多，揭幕戰小勝馬拉加1:0後連輸兩場，雙方狀態都冇保證之下，向入球大埋手較為上算，始終兩隊近6次對賽開咗5次大，咁好路點可以唔跟先！（now632台周一凌晨3:00直播）
近6次對賽5次開大

貝迪斯嘅人腳其實一啲都唔曳，除咗魯賓卡斯度同佐治摩連拿呢啲把握力不俗嘅前鋒，中場亦都有好波之人祖安華度派牌，配合速度極高嘅黑人球員施迪克，攻力絕對不容忽視，佢哋季初表現唔好，全因由安東尼奧艾美亞同佐治費古拉斯領導嘅防線，不時出現甩漏，今晚喺主場出擊，踢法肯定更進取，後防暴露嘅空位相信更大，呢啲典型嘅「攻強守弱」球隊，就最利開入球大喇。
普斯迪加大勇

華倫西亞嘅問題亦係攻優於守，莊拿斯干卡維斯同班尼加嘅級數固然唔使懷疑，仲有近期「弗」到漏嘅「禁區殺手」普斯迪加，此子近兩仗入3粒，仲要3球都極具質素，今晚隨時又有士哥！點知後防兩位中堅阿爾拉米同列卡度哥斯達，一面對速度型嘅「老鼠仔」就舉白旗，對住貝迪斯嘅「高速殺手」施迪克肯定投晒降，入得又失得，呢場入球騷開硬啦！
Data King 近10次對賽分出勝負

‧貝迪斯近6次主場對華倫西亞全部開出「入球單」。

‧雙方近10次對碰必分勝負，坐擁主場一方取得7勝3負成績。

‧雙方近8次交鋒，作客一隊未試過半場領先，錄得2和6負劣績。