費倫2.1倍讓主好合「里」

猪拉多纳

馬里奧高美斯着晒火

新球季以來首場意甲早場大戰，由重現勁旅本色嘅費倫天拿，主場迎戰卡利亞里。主隊雖有射手基奧斯比羅斯上陣成疑，但單係一個德國「新轟炸機」馬里奧高美斯，已經足以炸爆客軍，特別係卡利亞里嘅豆腐防線兩戰已經失咗4球，今場費倫雖然要讓一球，但一於博「紫百合」大勝，捧2.1倍「讓球主勝」！

（開賽時間：周日晚上6:30）

費倫自從上季由「飛機仔」蒙迪拿接過帥印之後，表現的確重現生氣，上季佢哋喺意甲以第4名過終點，僅僅錯失歐聯參賽資格。今個夏天佢哋繼續積極增兵，其中簽入馬里奧高美斯最有睇頭，加埋羅斯仔嚴重膝傷痊愈，火力即時躋身世界級，唔係講笑，費倫開季2戰就轟入7球，其中羅斯仔入3粒，高美斯就有2球進帳。
卡利亞里後防主將缺陣

雖然賽前有消息傳出，羅斯仔或因傷缺陣，不過蒙迪拿已經證實，困擾住羅斯仔嘅唔係膝傷舊患，即係話傷勢唔係嚴重，話唔定佢今仗先任後備，換邊後先落場一樣會有威脅。至於高美斯以往喺德甲有幾勁都毋須多講，再睇埋德國超級射手高路斯嚟到意甲入波易過執豆，高美斯肯定都會啱呢度嘅踢法。

更令力奇對佢哋充滿信心，係原來費倫歷來喺意甲主場25次鬥卡利亞里，係錄得21勝4和嘅不敗佳績，擺明食住對手。再者，卡利亞里今仗會有守將法蘭斯高比辛奴缺陣，條防線上仗都頂唔住AC要失3球，今晚睇怕都係凶多吉少，拎定個籮嚟捧蛋啦！