紅軍弱細征天鵝

猪拉多纳

「絕殺王」史杜列治唔弗

紅軍防守堅固、天鵝有後顧之憂，咁嘅Match Up試問又點會多波入？周二日凌晨英超獨腳戲，唯一保持未失分嘅利物浦南下作客史雲斯，紅軍雖有「絕殺王」史杜列治復任正選，但狀態成疑，利記去到自由球場不嬲冇運行，近兩造訪不勝兼零入球，而主隊心繫歐霸盃，3日後要作客華倫西亞，今戰將留一手，捧細為妙！

（now 621周二凌晨3時直播）
穩字行頭唔玩強攻

季初紅軍3戰3勝曾做英超一哥，而咁啱3場都係靠史杜列治嘅入波絕殺對手贏1比0，已反映利物浦係靠堅固防守，而非強橫攻力攞分，呢種「3分已袋，理鬼得你」嘅理念，相信已深植於主帥羅渣士腦中。事實上，羅帥曾教過史雲斯，深知「天鵝」非善男信女；加上紅軍對上兩次造訪自由球場，一場輸0比1，一場和0比0，以利物浦目前實力，今仗根本毫無甜頭，故有理由相信，羅帥會繼續以穩為先，絕對唔會恃住強勢冒險進攻，就算今仗作客畀佢哋贏到，分分鐘又係1球收工嗰隻。

由於有國際賽周隔一隔，令利物浦當紅前鋒史杜列治雖能趕及傷愈復出，但佢未必夠弗再做救世主，加上「進攻右閘」格連莊臣有傷，今仗換上韋斯頓，助攻力更大打折扣。巴西天才菲臘比古天奴又勢必被主隊派專人緊身招呼，新借將域陀摩西斯又未必咁快融入球隊，利物浦冇把握打破面對「天鵝」嘅入球荒。
史雲斯留力打歐霸　　

史雲斯對上一次打歐洲賽已經係91年嘅事，當時兩回合輸1比10畀摩納哥，22年後再征歐洲，球會上下都極度重視，今季對上兩次踢歐霸外圍賽前明顯留力，分別不敵曼聯同熱刺，整體演出麻麻。「天鵝」本周五凌晨就踢歐霸分組賽，作客西甲華倫西亞，大戰當前，史雲斯今場有所保留唔奇。

其實史雲斯嘅小組入楔打法，因球隊攻力非頂級，鬥勁旅根本冇着數。唔計本季首戰大敗曼聯腳下，上季「天鵝」主場鬥曼城、熱刺、阿仙奴、曼聯、利物浦同車路士僅得4和2負，當中有5場都開細。球隊今仗有快翼尼敦戴亞倦勤，中場舒維爾亦有傷在身未必可以倒戈，紅軍於英超仲未失波，今場雙方入球唔慌多。
領隊 Chit Chat

史雲斯領隊 米高盧特立：對史杜列治復出我感到驚訝，佢受傷唔踢國際賽，但48小時後又踢得聯賽。係咪應該修例，球員受傷後3至4日唔可以踢球會賽事呢？

利物浦領隊 羅渣士：史杜列治對錯過國家隊嘅賽事感到失望，佢好想為英格蘭上陣o架！今場因為係周一波佢先有得踢，如果係上周六打就唔使預佢。

猪拉多纳