勇敢福星對手平庸

猪拉多纳

　　今季暫時阿棟3匹重心馬獲冠季各一，貼熱門瓜咗，反而兩隻有錢分嘅馬跑得好，無意在此自吹自擂，係想帶出一個客觀事實，季初兵荒馬亂，熱門馬唔係好似賽前想像咁穩陣。所以，投X熱門時不妨停一停、諗一諗，先至付諸行動。

　　第一場五班1650米。如果係上季，我一定唔好咁早貼「京城精英」，吳定強向來比較慢熱，邊可能在九月更勢已經熱烘烘，不過，事實擺在眼前，佢已經攞到兩贏兩位，進佔練榜前列！

　　京城精英五班佔利

　　吳定強有此改變，歸根究底，梗係因為今季要贏夠15W有關，早發力係明智之舉，有馬唔搏，唔通又想臨急抱佛腳，實在太大風險。講到呢匹「京城精英」，長居五班着數，一聲令下，隨時係「領航精神」翻版。

　　第二場四班1200米。有啲擔心「勇敢福星」係咪有高質，再大1歲，唔通5歲先至大熟？我又唔敢否定，亦因為相信蔡神仙及韋達，先至揀佢首選。實在今場賽事水準唔高，好多唔係呢個路程嘅馬，又有啲未成氣候，蜀中無大將之下，機會自然提高。

　　第八場二班1650米。「智高星」二班負重磅，問心講，唔係季初，未必睇得起佢，勝在係谷草一哩專材，B欄排到內欄，有便宜唔使洗頸。另一方面，隻馬一向演出唔係太過波動，贏唔到都會跑得接近，尾場揸膽，以佢最值得信任，至於，博唔博W，睇賠率而定，6、7倍以上，仲可以考慮。