中央陸軍＋2搵仁着數

猪拉多纳

衞冕之師「首戰不勝魔咒」

衞冕嘅拜仁慕尼黑歐聯首戰，係喺Ｄ組於安聯球場迎戰俄羅斯嘅莫斯科中央陸軍，表面拜仁都好似實食無黐牙，但原來歐聯近年有個「衞冕魔咒」，冠軍球隊翌季分組賽首戰實贏唔到，加上哥迪奧拿同球隊嘅磨合仲未有良好效果，同埋拜仁聯賽開咧至今未贏過盤，綜合種種原因，今場推介大家捧受讓2球嘅莫斯科中央陸軍「讓球客勝」。

（有線63台周三凌晨2時45分直播）

本來拜仁慕尼黑嘅波，理應由德甲專家蘇斯黑柴同大家分析，但今場連黑柴都推莊話呢期拜仁捉唔到路，為捧場客着想唔會亂咁寫推介，就知今場幾咁惡揀。
拜仁今季六場都輸盤

事實上，拜仁今季表現真係唔Sharp，箇中原因唔少人都提過，哥迪奧拿嘅巴塞式踢法唔啱拜仁，從成績未必睇得一清二楚，雖然暫時球隊仍然不敗，仲捧埋歐洲超級盃，但從盤路分析，除咗德甲未正式開咧前一場德國盃大炒過列頓5比0贏波贏盤，之後六場波都係輸盤，玩上盤或者「讓球勝」輸凸。

唔單止咁，原來近年歐聯衞冕球隊有個「首戰不勝魔咒」，由08年盟主曼聯開始，至到上年嘅車路士，全部分組賽戰首戰都贏唔到，仲咁啱得咁蹺全部和晒添，今仗莫斯科中央陸軍受讓兩球當然抵玩，進取啲嘅朋友不妨補少少和波，有成８倍真係幾好分。