曼聯 利華 博火做大騷

猪拉多纳

費蘭尼歐聯首演誓顯身價

新一屆歐聯今晚Kick Off！打頭陣出場嘅有A組兩支出線熱門大戰，由英超勁旅曼聯喺奧脫福擺陣迎戰德甲球隊利華古遜。雙方風格都係崇尚進攻，紅魔新兵費蘭尼終於有得踢佢夢寐以求嘅歐聯，阿占睇好佢可以喺呢個最強舞台大放異采，呢位「爆炸頭」更可能成為曼聯入波秘密武器，一於同利華嘅孫弘民同傑斯寧鬥入波，1.72倍入球大值捧！

（有線61及201周三凌晨2:45直播）

費格遜帶領下嘅曼聯喺歐聯有過唔少光輝歲月，但「歐聯新丁」莫耶斯接手，球迷都唔敢對依家嘅紅魔抱太大期望，始終莫耶斯仲未喺歐洲賽事證明自己能力。阿占明白大家質疑，但爛船始終都有三斤釘，何況曼聯依家點都唔算係「爛船」，剛啱爆頭嘅朗尼傷愈復出，同尹佩斯合作愈嚟愈有默契，上場就各入一粒，尋日仲好番晒唔使戴住個箍練波，加埋韋碧克嘅組合亦已經證實係Work，入波唔成問題。
希比亞熟「魔」路放膽進攻

費蘭尼今場係另一焦點，佢話因為恨踢歐聯所以決定加盟曼聯，今晚就係佢夢想成真嘅日子，唔少人認為「爆炸頭」嚟到可加強曼聯防守，但阿占就好認同前曼聯球星貝治嘅分析，佢話可以勝任多個位置嘅費蘭尼，更適合出任進攻中場，以呢位比利時國腳嘅噸位同身高，入到禁區真係無幾多個後衞頂得住，話唔定佢同尹佩斯隨時先係夢幻組合！

利華古遜目標係以小組次名出線，希望就擺晒喺孫弘民同傑斯寧呢對箭頭身上，前者賽前自爆今夏曾經收到曼聯嘅斟介，證明佢實力已經得到頂級球會認同，而且利華教練希比亞當年踢英超已經熟晒曼聯路數，今場自然夠晒信心同紅魔搶攻啦！
頂占筍盤：曼聯（入球大）

利華弗爆「讓客」有得諗

曼聯主帥莫耶斯無歐聯領軍經驗，又唔擅長同強隊交手，今季遇上實力分子車路士同利物浦只係攞到1和1負成績。上場對住水晶宮，即使打多一個亦只憑2次死球入波，表現欠說服力。相反對手利華古遜開季表現出色，近6場贏5場之餘，當中一對箭頭傑斯寧同悉尼森姆嘅狀態「着晒火」，佢哋兩個開季至今各自轟入6球，有力幫隊波喺奧脫福球場搶分而回，2.12倍「讓球客勝」抵玩。