曼城傷兵多客途艱「辛」

猪拉多纳

堂堂「億萬大軍」幾乎畀史篤城收死，曼城今晚喺歐聯D組登場，梗想攞番個彩搵柏辛域陀尼亞出氣。之不過佢哋傷兵唔少，今晚去到捷克更加係「人丁單薄」，做足功課嘅柏辛域陀尼亞有望踩多腳落曼城面，受讓半一要1.9倍下盤！

（有線62及202周三凌晨2:45直播）
柏辛域陰招趕絕藍月亮Fans

曼城除咗開季大炒紐卡素4蛋外，打後幾場波完全表現唔到霸氣。今晚守將高柏尼雖有隨軍，迪米捷利斯就仲未出得，意味查維加西亞又要夾硬客串中堅，最弊係指揮官大衞施華都因為大腿傷缺陣，曼城家吓正式係攻不銳守不穩，仲點信得過呀？

對家柏辛域陀尼亞嘅實力肯定輸曼城一截，但會方認真絕，本身已經撥得嗰600張客場波飛畀曼城，早幾日額外加推少量門票，但竟然一張收成86鎊（約1,058港元），要知道86鎊喺曼城主場可以買到22個肉批，班藍月亮Fans今年1月都因為阿仙奴嘅客場配額波飛標價62鎊而杯葛入場，試問又點會豪到用86鎊睇柏辛域陀尼亞先？咁即係話入場撐曼城嘅Fans多極有限，賽前狂煲曼城Video嘅柏辛域陀尼亞，齋求不敗搶1分唔係冇機。