奧林比熟法甲「門」路受讓筍

猪拉多纳

歐聯分組賽今晚揭開戰幔，C組由希臘球隊奧林比亞高斯喺主場會師法甲班霸巴黎聖日耳門，雙方球員身價雖則差天共地，但奧林比亞高斯有唔少球員到過法國搵食，過往兩屆歐聯鬥法國兵亦寧舍醒神，主場受讓吼實1.72倍「讓球主勝」。

（開賽時間：周三凌晨2:45）
PSG今季入球數字偏低

奧林比亞高斯前線由「野兔」沙維奧拿數胡夠晒卡士，中場拿汀加、保羅馬查度、中堅麥贊尼在內多名猛將踢過聖伊天及摩納哥等球會，熟晒法國波條路。再者，佢哋近兩屆歐聯分組賽遇上法國兵表現唔輸蝕，喺前屆鬥馬賽取得1勝1負成績，上屆更加雙殺蒙彼利埃，配合埋聯賽4連勝強勢出戰，今場絕唔輸蝕。

另方面，聖日耳門經歷聯賽開咧2連和之後，成功締造3連勝狀態唔錯，不過入球數字偏低，證明現今球壇兩大神鋒伊巴謙莫域同卡雲尼仲未夾熟，今輪作客奧林比亞高斯除咗係雙方史上第一次對決，亦係PSG喺歐聯首度火併希臘球會，有咁多不明因素，客勝制唔過。