拿玻里 多蒙特 世界級射手「大」晒冷

猪拉多纳

歐聯分組賽抽籤之後，F組就被視為「死亡之組」，阿仙奴、多蒙特、馬賽同拿玻里4支頂級球隊實力接近，即使最後邊隊出線都唔可以話係爆冷，所以每場波每1分都要搏老命！今晚拿玻里主場迎戰多蒙特就肯定好睇過戲，拿玻里中前場個個都係好波之人，上屆亞軍多蒙特亦係火力十足，今場幾大都要捧1.8倍「入球大」呀！

（有線63周四凌晨2:45直播）
希古恩歐戰經驗足

拿玻里近年喺意甲極速彈起，今個暑假雖然賣走烏拉圭射手卡雲尼，但有筆錢大事擴軍，實力比起上季有過之而無不及，大破慳囊嘅會長迪羅倫迪斯就講到明要喺歐聯拎到成績，請賓尼迪斯執教就係睇中佢張靚CV，擁有贏盡歐洲賽事嘅經驗，所以阿占對呢支意甲傳統勁旅嘅表現都好期待。

事實上，拿玻里最大賣點就係希古恩、咸錫、荷西卡利祖同恩斯治尼呢個進攻組合，前者嘅把握力同入球觸覺都係世界頂尖，歐洲賽經驗又豐富；至於咸錫嘅瀟灑腳法同視野亦舉世聞名，其實佢哋嘅實力都唔使多介紹，勢估唔到加入埋走位靈活嘅荷西卡利祖同意大利超新星恩斯治尼後，攻擊力當堂提升至少一個檔次，主場出擊入波唔成問題。
奧巴美揚表現對辦

作客嘅多蒙特上屆殺入決賽後雖然飲恨而回，但已經贏到全歐洲嘅尊重，羅拔利雲度夫斯基、馬高列奧斯、再加埋新兵奧巴美揚同米希達利恩呢條進攻線，同樣係世界頂尖組合，不過防中根度簡嘅受傷令到「蜜蜂兵團」防守無咁硬淨，作客意大利面對以鋒力強勁見稱嘅拿玻里肯定唔會靠守勢波，今場對攻機會極大，捧入球大穩陣。
拿玻里歐聯主場戰績勁

最近1次出戰歐聯（11/12球季），拿玻里主場4戰錄3勝1和。

拿玻里連開3口角球細。

多蒙特新季未試過半場落後。
首球吼實荷西卡利祖

拿玻里主場出名夠惡，玩首名入球當然向佢哋陣中嘅攻擊球員埋手，當中新加盟嘅荷西卡利祖Fit到爆，新季3場意甲場場有波入，呢位西班牙翼鋒最耍家係突破越位入楔，撞啱多蒙特守將比薛斯基養緊傷，「蜜蜂兵團」繼續要靠司職攻擊中場嘅哥斯基奧斯客串右閘，喺德甲就話頂得吓啫，對住卡利祖隨時出事都似！
歐聯F組

頂占筍盤：拿玻里（入球大）