阿仙奴傷兵多讓「賽」盞搞

猪拉多纳

歐聯今晚繼續開戰，法甲球隊馬賽喺F組主場迎戰英超「Big4」阿仙奴，受讓平半有得爆。雖然「兵工廠」新簽嘅奧斯爾首次上陣已經有料到，艾朗藍斯近期又大爆發，但據講基奧特要忍受足踝傷痛紮住上，而且傷兵滿營要應付緊密賽程好不利，不如冷敲馬賽受讓平半嘅1.78倍下盤。

（有線61及201周四凌晨2:45直播）
基奧特紮住上撼馬賽

阿仙奴喺傷兵成籮嘅劣勢下，竟然能夠連贏5場，包括日前喺聯賽以3:1打沉新特蘭，除咗奧斯爾轉會後首次上陣即刻交靚波畀基奧特入波，艾朗藍斯更加延續熱身賽出色狀態梅開二度。可惜吖，正當一切好似好順利，基奧特對新特蘭完場前又受傷，雖然佢話傷勢唔算嚴重，今場可以出得，但火熱狀態難免會跌Watt。再講，今季「兵工廠」依然有大量傷兵，隊長華美倫要周日對史篤城至能夠復出，辛迪卡索拉更加要抖幾個禮拜，咁嘅情況要兼顧歐聯，球員唔攰就假。

另邊廂嘅馬賽，射手基格納曾經喺開季連續3場入波，狀態唔輸蝕，加上防守力唔算差，呢場再遇去年至離開蒙彼利埃嘅基奧特，熟路情況下應該Mark得掂對方，冷敲下盤博主場不敗好過。
歐聯F組