文廐質新子彈多

猪拉多纳

　　一個馬房成績好唔好，有時要睇廐內馬匹的平均年齡有冇偏高。如果廐內大部分馬都是年達六歲以上的老黃忠，就算練馬師幾厲害，幾妙手回春都好，其實都幾惡搞。

　　對上幾季，文家良馬房成績有下滑迹象，或多或少是跟廐內分子漸漸老去有關。然而，由上季尾開始，文廐開始踏入換血時期，不時有質新馬於陣上交出良佳表現，如「寶寶飛龍」、「喜多盈」等，文家良馬房今季隨時靠這批質新馬反彈。

　　剛周二快活谷賽事，文廐又有另一匹質新分子贏馬，牠就是第四場的「常開心」，這匹自購馬上季三戰田草全負，而且一輸就輸五個馬位以上，但今季落四班兼初跑谷草，竟然脫胎換骨，即使負133磅亦可在1650米交出強橫竄勁獲冠。由於文廐質新馬開竅後連戰連勝的例子實在不少，他日「常開心」升上三班作賽，還是秤先為妙。

　　另外，根據今季四個賽日觀察所得，三位新公司騎師田泰安、彭利力及歐道樂，暫時以前者的表現最為突出，至今已贏四W之餘，前晚更在谷草夜賽憑「你知我心」及「馬得利」起孖。最得意是田泰安暫時四場頭馬都在短途賽中取得，宜加留意。(洋超)