鬥牛3雄歐霸狂奔

猪拉多纳

貝迪斯勇銳唔驚里

西班牙足球近年威到盡，國家隊被封為「地上最強」，巴塞皇馬於歐聯呼風喚雨，但喺歐霸就係另一回事，上屆歐霸僅得利雲特一隊西甲兵打入歐霸16強，真係羞家。今屆華倫西亞、貝迪斯及西維爾肩負「復興」使命，「鬥牛」3雄聽日凌晨分途出擊，又睇吓佢哋爭唔爭氣！

Ｉ組賽事貝迪斯主場鬥法甲褪色勁旅里昂，貝迪斯剛於主場大破實力份子華倫西亞，士氣狀態一流。里昂早前於歐聯附加賽被另一支西甲球隊皇家蘇斯達技術性擊倒，今次再遇剋星注定冇運行，主Ｗ或讓半一嘅上盤皆可取。

（有線64及203台周五凌晨3時05分直播）
里昂頹勢未止５場不勝

里昂早前於歐聯附加賽主客兩回合共吞皇家蘇斯達四蛋，信心大受打擊，連同呢兩場比賽已經連續五場未贏過，當中僅入得一球，表現令人失望。里昂近年受財困影響不斷賣走主力，米高巴斯圖斯、洛夫雲、利辛度盧比斯等先後離隊，已經無復當年勇，未來要兼顧歐洲賽事更加唔樂觀。

相反貝迪斯於附加賽兩挫捷克球隊積布尼克晉級，演出極具說服力，其中射手佐治摩連拿兩回合都有士哥，而且佢喺上周末聯賽大勝華倫西亞３比１之役亦有進帳，今場勢成里昂防線心腹大患，以貝迪斯連續兩場主場比賽都能淨勝兩球以上嚟計，1.75倍主Ｗ固然可捧，進取啲嘅球迷亦可博埋讓半一嘅上盤。

猪拉多纳